الجزائر نے جمعرات کو متحدہ عرب امارات کے ساتھ سفارتی تعلقات منقطع کرنے کا اعلان کیا ہے۔ یہ فیصلہ دونوں ممالک کے درمیان کئی برسوں سے جاری بڑھتی ہوئی کشیدگی کے بعد سامنے آیا ہے۔
الجزائر کی وزارتِ خارجہ نے ایک بیان میں کہا کہ دوطرفہ تعلقات برقرار رکھنے کے لیے تمام ممکنہ کوششیں اور ذرائع استعمال کیے جانے کے بعد حکومت نے یہ فیصلہ کیا ہے۔
وزارتِ خارجہ کے مطابق متحدہ عرب امارات کے سفیر کو وزارت کے دفتر میں طلب کیا گیا، جہاں انہیں باضابطہ طور پر الجزائر کے فیصلے سے آگاہ کیا گیا۔ سفیر کو فیصلے پر عمل درآمد کے لیے 48 گھنٹے کی مہلت بھی دی گئی ہے۔
الجزائر نے کہا کہ متحدہ عرب امارات کی جانب سے بڑھتی ہوئی ’’اشتعال انگیز یا معاندانہ کارروائیوں‘‘ کے پیش نظر اس نے طویل عرصے تک تحمل کا مظاہرہ کیا اور اماراتی حکام کو ان اقدامات کے ممکنہ سنگین نتائج سے آگاہ کیا۔
دونوں ممالک کے درمیان گزشتہ برسوں کے دوران تعلقات میں کشیدگی میں اضافہ ہوا ہے۔ الجزائر اس سے قبل متحدہ عرب امارات پر اپنے داخلی معاملات میں مداخلت کے الزامات بھی عائد کر چکا ہے۔
دوسری جانب متحدہ عرب امارات کی وزارتِ خارجہ نے کہا کہ وہ الجزائر کے فیصلے کا احترام کرتی ہے اور تمام ممالک کے ساتھ تعلقات کو فروغ دینے اور مضبوط بنانے کے لیے اپنی مستقل کوششوں پر زور دیا، تاکہ مشترکہ مفادات، باہمی تعاون، مفاہمت اور خوشحالی کو فروغ دیا جا سکے۔
سفارتی تعلقات منقطع کرنے کا یہ فیصلہ الجزائر اور متحدہ عرب امارات کے درمیان تعلقات میں ایک اہم سفارتی بحران کی نشاندہی کرتا ہے، جبکہ دونوں ممالک کے مستقبل کے تعلقات کے بارے میں صورتحال غیر یقینی ہوگئی ہے۔