رابطہ عالم اسلامی نے مذہبی اقلیتوں کے حقوق کے تحفظ اور مذہبی تنوع رکھنے والے معاشروں میں باہمی احترام و ذمہ داری کے فروغ کے لیے اپنی عالمی کوششیں جاری رکھنے پر زور دیا ہے۔
رابطہ عالم اسلامی کے مطابق مذہبی تنوع رکھنے والے معاشروں میں اقلیتوں کو ان کے حقوق اور ذمہ داریوں سے آگاہ کرنا ضروری ہے۔ ان کوششوں میں مختلف ممالک میں مقیم مسلم اقلیتیں بھی شامل ہیں، تاکہ ان میں دینی شعور کو فروغ دیا جا سکے اور وہ اپنے معاشروں کے ساتھ مثبت اور مؤثر انداز میں تعامل کر سکیں۔
رابطہ عالم اسلامی نے کہا کہ اس مقصد کے لیے ایسے مذہبی رہنماؤں کے ساتھ تعاون کیا جا رہا ہے جو معتدل اسلامی منہج کے حامل ہیں اور اپنے اپنے ممالک میں باضابطہ طور پر تسلیم شدہ حیثیت رکھتے ہیں۔
میثاق مکہ مکرمہ کے حوالے سے تربیتی پروگرام
اسی سلسلے میں رابطہ عالم اسلامی نے مختلف اداروں اور مذہبی و فکری شخصیات کے ساتھ متعدد معاہدوں، مفاہمتی یادداشتوں اور تعاون کے معاہدوں پر دستخط کیے ہیں۔ ان معاہدوں کی بعض شقوں میں میثاق مکہ مکرمہ سے متعلق تربیتی پروگرام بھی شامل ہیں۔
میثاق مکہ مکرمہ پر مختلف اسلامی مکاتبِ فکر سے تعلق رکھنے والے 1200 سے زائد علمائے کرام اور مفتیانِ عظام نے دستخط کیے تھے۔ یہ میثاق مکہ مکرمہ میں منعقد ہونے والے ایک جامع علمی اجتماع کے دوران پیش کیا گیا تھا۔
رابطہ عالم اسلامی کے مطابق میثاق مکہ مکرمہ نے متعدد معاصر مسائل اور چیلنجز کے حوالے سے دینی شعور اجاگر کرنے، اعتدال کے فروغ اور شرعی موقف کی بنیادوں کو مضبوط بنانے میں نمایاں کردار ادا کیا ہے۔
رابطہ عالم اسلامی کی ان کوششوں کا مقصد مذہبی تنوع رکھنے والے معاشروں میں باہمی احترام، ذمہ دارانہ شہری کردار اور مثبت مذہبی تعامل کے فروغ کے لیے علمی و تربیتی تعاون کو مزید وسعت دینا ہے۔