نئی دہلی، 30 ستمبر 2026:
الیکشن کمیشن اور ووٹر لسٹ کی خصوصی گہری نظرثانی (SIR) کے معاملے پر انڈیا اتحاد نے اپنی احتجاجی سرگرمیوں کو مزید تیز کرنے کا اعلان کیا ہے۔ اتحاد نے 2 سے 8 اکتوبر تک ملک بھر کے اضلاع میں ’جمہوریت بچاؤ مارچ‘ نکالنے کا فیصلہ کیا ہے۔
کانگریس صدر ملکا ارجن کھڑگے نے بدھ کو نئی دہلی میں انڈیا اتحاد کے اجلاس کے بعد احتجاجی پروگرام کا اعلان کیا۔ انہوں نے بتایا کہ 6 اکتوبر کو اپوزیشن کے ارکانِ پارلیمنٹ الیکشن کمیشن کے دفتر تک مارچ کریں گے۔ اپوزیشن جماعتوں نے چیف الیکشن کمشنر گیانیش کمار کے استعفے، SIR واپس لینے اور آئندہ انتخابات بیلٹ پیپر کے ذریعے کرانے سمیت متعدد مطالبات پیش کیے ہیں۔
اتحاد نے یہ بھی اعلان کیا ہے کہ اکتوبر کے دوسرے ہفتے میں اپوزیشن رہنما صدر دروپدی مرمو سے ملاقات کرکے انتخابی عمل اور ادارہ جاتی معاملات سے متعلق اپنے خدشات پیش کریں گے۔
مغربی بنگال کی سابق وزیر اعلیٰ ممتا بنرجی نے بدھ کے روز کہا کہ انڈیا اتحاد پوری طرح متحد ہے۔ انہوں نے چیف الیکشن کمشنر گیانیش کمار پر سخت تنقید کرتے ہوئے انہیں ’ڈاکو‘ قرار دیا اور ان کی فوری برطرفی کا مطالبہ کیا۔
انڈیا اتحاد کے رہنماؤں کے ساتھ مشترکہ پریس کانفرنس سے خطاب کرتے ہوئے، جہاں اتحاد نے مشترکہ طور پر ’جمہوریت بچاؤ‘ مارچ اور ریلیاں نکالنے کا فیصلہ کیا، ممتا بنرجی نے کہا کہ اپوزیشن نے مدھیہ پردیش، ہریانہ، بہار اور مغربی بنگال میں ’ووٹ چوری‘ کے معاملے کو بارہا اٹھایا ہے۔
انہوں نے 2024 کے لوک سبھا انتخابات کے دوران بھی مبینہ انتخابی بے ضابطگیوں اور انتخابی عمل میں مبینہ جوڑ توڑ پر تشویش کا اظہار کیا۔
ممتا بنرجی نے کہا، ’’راہل گاندھی اور تیجسوی یادو نے بہار میں ووٹ چوری کا معاملہ اٹھایا تھا۔ ہم نے مدھیہ پردیش، ہریانہ، بہار اور بنگال کے ساتھ ساتھ 2024 کے لوک سبھا انتخابات میں بھی انتخابی عمل میں مبینہ جوڑ توڑ کے خدشات کا اظہار کیا ہے۔‘‘
دوسری جانب بی جے پی نے انڈیا اتحاد کے احتجاجی پروگرام پر تنقید کی ہے۔ مرکزی وزیر شیوراج سنگھ چوہان نے اپوزیشن کے الزامات کو مسترد کرتے ہوئے کہا کہ انتخابی شکست کے بعد اس طرح کے الزامات عائد کیے جا رہے ہیں اور اسے ”شکست کے بعد کی مایوسی“ قرار دیا۔ بی جے پی رہنماؤں نے الیکشن کمیشن اور ووٹر لسٹ کی نظرثانی کے عمل کا دفاع کیا ہے۔